रसुवामा गत असार २३ गते आएको बाढीपहिरोले पुर्याएको क्षतिमा करिब २९ करोड रुपैयाँबराबरको बिमा रकम दाबी भएको छ । शिखर इन्स्योरेन्स, नेको इन्स्योरेन्स, सगरमाथा लुम्बिनी इस्योरेन्ससहित ९ वटा कम्पनीमा विमितहरुले २८ करोड ९२ लाख रुपैयाँको दाबी गरेका हुन् ।
बिमा प्राधिकरणकाअनुसार शिखर इन्स्योरेन्समा १० वटाको १६ करोड १२ लाख रुपैयाँको दाबी गरिएको छ । नेको इन्स्योरेन्समा ३ वटाको ५ करोड १२ लाख, सगरमाथा लुम्बिनी इस्योरेन्समा ७ वटाको ३ करोड ४१ लाख, सानिमा जिआईसी लिमिटेडमा ६ वटाको ७७ लाख, आइजीआई प्रूडेन्सियल इन्स्योरेन्स कम्पनीमा ९ वटाको ७५ लाख ५० हजार रुपैयाँको माग दाबी परेको छ । यस्तै युनाइटेड अजोड इन्स्योरेन्समा ३ वटाको ६८ लाख, एनएलजी इन्स्योरेन्समा ६ वटाको ४७ लाख, सिद्धार्थ प्रिमियर इन्स्योरेन्समा ७ वटाको ३१ लाख रहेको छ ।
प्राधिकरणका अनुसार, कुल ६३ वटा मागदाबीमध्ये सामुन्द्रिक बिमातर्फ ६ वटा दाबी परेको छ भने इन्जिनियरिङ तथा ठेकदार जोखिमतर्फ ४ वटा, सम्पत्ति बिमातर्फ १० वटा, मोटर बिमा (सार्वजनिक)तर्फ ३२ वटा, मोटर बिमा निजीतर्फ ११ वटा मागदाबी परेको छ ।
चीनतर्फबाट आएको बाढीपहिरोले नेपाल–चीन जोड्न मितेरी पुलसमेत बगाएको थियो । बाढीले ड्राइपोर्टका साथै सवारी साधन, कन्टेनर पनि बगाएको छ ।
