अमेरिकी कदमबारे चीनको कडा प्रतिक्रिया, भन्यो : मादुरोलाई तुरुन्त रिहा गरियोस्
बेइजिङ- चीनले अमेरिकासँग भेनेजुएलाका राष्ट्रपति निकोलस मादुरो र उनकी पत्नीलाई तुरुन्त रिहा गर्न माग गरेको छ। दुवैजना अहिले अमेरिकी हिरासतमा छन्।
अमेरिकी सेनाले उनीहरूलाई भेनेजुएलाको राजधानी कराकासबाट कब्जा गरी अमेरिका लगेको बताइएको छ।
चिनियाँ विदेश मन्त्रालयले आइतबार जारी गरेको विज्ञप्तिमा राष्ट्रपति जस्तो पदमा रहेका व्यक्तिलाई यसरी आफ्नै देशबाट उठाएर लैजानु गलत भएको जनाएको छ।
यस विषयको समाधान संवादमार्फत हुनुपर्ने चीनको भनाइ छ। यसअघि पनि चीनले अमेरिकी कारबाहीप्रति कडा प्रतिक्रिया जनाइसकेको छ।
न्यूयोर्क सिटीका मेयर जोहरान ममदानीले पनि राष्ट्रपति मादुरोको गिरफ्तारीप्रति असन्तुष्टि व्यक्त गरेका छन्। उनले यसलाई ‘युद्धको कार्य’ भन्दै अन्तर्राष्ट्रिय र अमेरिकी कानुन दुवैको उल्लङ्घन भएको बताए।
अमेरिकी सैनिकहरूले २ जनवरीको रात भेनेजुएलामाथि आक्रमण गरी राष्ट्रपति निकोलस मादुरो र उनकी पत्नी सिलिया फ्लोरेसलाई कब्जामा लिएका थिए।
त्यसपछि उनीहरूलाई न्यूयोर्क ल्याई डिटेन्सन सेन्टरमा राखिएको छ। उनीहरूमाथि हतियार र लागूऔषधसँग सम्बन्धित मुद्दामा मुद्दा चलाइने बताइएको छ।