कलैया, २६ माघ
कलैया उपमहानगरपालिका वडा नं. १४ स्थित बघवन स्वास्थ्य चौकीले आफ्नो कार्यक्षेत्रभित्र रहेका विभिन्न विद्यालयहरूमा पाठेघरको मुखको क्यान्सर विरुद्धको HPV (Human Papillomavirus) खोप अभियान सफलतापूर्वक सञ्चालन गरिरहेको छ।
नेपाल सरकारको नियमित खोप कार्यक्रम अन्तर्गत सञ्चालन भइरहेको उक्त अभियान विशेष गरी किशोरीहरूलाई लक्षित गरी अघि बढाइएको हो। किशोरावस्थामै HPV खोप लगाउँदा भविष्यमा पाठेघरको मुखको क्यान्सरबाट बच्न सकिने भएकाले यस अभियानलाई महत्वपूर्ण मानिएको स्वास्थ्यकर्मीहरूले बताएका छन्।
बघवन स्वास्थ्य चौकीका अनुसार वडा भित्रका सामुदायिक तथा निजी विद्यालयहरूमा अध्ययनरत लक्षित उमेर समूहका छात्राहरूलाई विद्यालयमै पुगेर खोप सेवा प्रदान गरिएको छ। खोप लगाउने क्रममा स्वास्थ्यकर्मीहरूले HPV संक्रमण, पाठेघरको मुखको क्यान्सरका जोखिम, लक्षण तथा बच्ने उपायबारे समेत सचेतनामूलक जानकारी दिएका छन्।
स्वास्थ्य चौकी इन्चार्जले पाठेघरको मुखको क्यान्सर महिलाहरूमा देखिने गम्भीर स्वास्थ्य समस्यामध्ये एक भएकाले यसको रोकथामका लागि HPV खोप अत्यन्त प्रभावकारी रहेको बताउँदै लक्षित सबै किशोरीलाई खोप लगाउन आग्रह गर्नुभयो। अभिभावक, विद्यालय प्रशासन तथा स्थानीय जनप्रतिनिधिको सहयोगले अभियान प्रभावकारी बनेको उहाँको भनाइ छ।
स्थानीय विद्यालयका प्रधानाध्यापकहरूले विद्यालयमै आएर निःशुल्क खोप सेवा उपलब्ध गराइनु सकारात्मक कदम भएको बताउँदै यसले छात्रा र अभिभावक दुवैमा स्वास्थ्यप्रति सचेतना बढाएको प्रतिक्रिया दिएका छन्।
स्वास्थ्य चौकीका अनुसार अभियान आगामी दिनहरूमा पनि निरन्तर जारी रहनेछ भने छुट भएका लक्षित समूहलाई समेत समेट्ने तयारी गरिएको छ। यस अभियानले दीर्घकालीन रूपमा महिलाको स्वास्थ्य सुधार र पाठेघरको मुखको क्यान्सर नियन्त्रणमा महत्वपूर्ण योगदान पुग्ने अपेक्षा गरिएको छ।
